O Herr schmeiß Hirn ra....

O Herr schmeiß Hirn ra, om was i di bitt,
i frog mi blos, wo Du des her nemma witt.
Ob des bißle, mo bei Dir doba isch,
net scho längschtens eitrocknet ischt?
- oder sollt mr mol da Teufel froga,
aber - vielleicht sen mir henterher no ärger betroga.

En dr Politik fehlts am meischta - do wurd blos no bschißa,
ond mit Geld - mo net do isch - omenander gschmissa.
Verschprecha deant se viel - ob Weib, ob Ma,
denn was goht mi mei saudomms Gschpräch vo
Vorgeschtern a!

En der Wirtschaft, sprich Berufswelt, isch au nemme des,
entweder heulsch mit de Wölf - oder n- kasch mit
de Gees!
Wenig läßt mr de ogschtört schalta ond walta,
wenn da g'mobbt wirsch kasch de selta halta.

"Gerecht" gohts au nemme zua uf dera Welt,
dia mo net schaffa wöllet kriagat am Meischta Geld...
Viel Andere hen au da Boga raus,
dia herrschat mit Raub, Mord ond Totschlag, s'isch grad
an Graus!

D'Kircha - egal was für a Konfessio - sen au nemme "In"
Was dr Papscht verbiatat, hot au net viel Sinn!
De meischte Leut glaubet an gar nex mei,
bloß - wenn se en Not sen - fällt en dr Herrgott ei!

D'Téchnik ond d'Mode überholet sich selber ,do kasch
blos no gucka,
an dr Medizin gega Krebs, Aids ond BSE kasch de
bais verschlucka.
Irgendwann toilt sich d'Menschheit selber ei,
en d'Intelligenzbolza ond d'Arbeiter - so muaß sei!

Selbscht dr "Wettergott" Petrus woiß nemme was er will,
i glaub, bei deam isch s'ganz Johr April!
Vielleicht fühlt er sich gschtört vo Weltraumstationa
ond Satellitta,
zom "guat Wettermacha" braucht mr Ruah, des isch
obeschtritta!

Drom Herrgott, sei so guat - om was i di bitt:
schmeiß Hirn ra - kasch her nemma vo mo da witt,
streu's gleichmäßig aus - über d'Menschheit nei,
wenns Klappt, wöllet mir au recht dankbar sei!