Sommerkreislauf oder a "Sauhitz"

Jetzt isch Sommer - jetzt isch hoiß,
renna duat ganz arg dr Schwoiß.
Am liabschta dät mr näckich laufa
ond meischtbietend au no d'Haut verkaufa.
A jeder suacht a schattigs Plätzle
ond macht vielleicht au a klois Schwätzle.
Mr dät gern onder dr Dusche schtanda bleiba,
oder sich am ma Schtrand d'Zeit vertreiba
- en dr Hand a kühl's, voll's Glas,
oder a Eis - des wär doch was!

Doch - öfter - noch ma hoißa Dag
tuets an reachta G'witterschlag.
A bißle Rega wär ganz fei,
bloß dr Hagl müßt net sei.
So a G'witter reinigt d'Luft,
henterher riecht mr wieder Blütaduft.
Morga isch's no wieder schee,
vor lauter "Sauhitz" isch mr halba he.
Dr Kreislauf fangt vo vorna a
ond schwitza deant Älle, Ob Frau oder Ma.....