Schtreß

Schtreß isch - wenn oaner z'viel tuet - ond woaß net worom -
ond saut vor lauter - laß me au mit - em Viereck rom!
Mr läßt sich hetza ond hot emmer koa Zeit,
woaß nemme, was Andere am Leba so freut.

Scho morgends noch am ufschtanda fangt des a,
mr schtreitet, wer z'erschta mit am duscha isch dra.
S'Frühschtück nemmt mr em schtanda ei,
mr sott scho längscht am Arbeitsplatz sei.

Onderwegs fahret vor oam bloß lahme Enta,
wer net zügig fahra ka - sott vo dr Schtroß verschwenda.
Dr Parkplatz isch voll, vorna koa Plätzle zom fenda,
höchschtens uf dr Wendeplatte - ond dui isch ganz henda.

Em G'schäft gohts grad so weiter - älles lauft quer -
mo nemmt mr bloß d'Kraft zom langsam toa her?
Eigentlich goht's älle gleich - ob am Band oder em Büro,
willsch guat verdeana - no isch des halt so!

Mr schafft ond wuahlt ond fendet koa End,
müad isch dr Kopf ond vor ällem d'Händ.
Beim Hoamfahra derf mr s'eikaufa net vergessa,
sonsch geits heit Obed nix zom Essa.

Dr Supermarkt isch voll, viel Leit sen dren,
vor Ällem dia, mo eigentlich da ganza Tag Zeit hen!
Mr hot koa Geduld - kauft halt irgendwas ei,
mr schiabts drhoam doch bloß en d'Mikrowell nei.

Noch getaner Ärbet - guat essa - do kennet mir nix,
am beschta "Rezept holländisch" - direkt " van der Bix!"
Hauptsach mr wurd satt - ond dr Maga geit Ruah,
vorm Fernseher fallet oam sowiaso d'Auga glei zua!

I frog mi bloß - ja ka's denn des geba,
isch des Älles - was bleibt vom Leba?
Mir hot's an Riß gea - en meim Hirn hots g'funkt,
i schtand jetzt voll uf am "Leck-me-am-Arsch-Schtandpunkt!"

Mi könnet Älle kreuzweis - ond hentrefür' -
i will no was vo meim Leba - des sag i Dir!
- Doch - s'isch an Teufelskreis - uf dr ganza Welt,
guat leba koschtet halt viel Geld!

So schtreß i mi weiter - da ganza Tag,
au wenn i zua mir selber: "tua g'schtät" sag!
Grad - wenns pressiert muaß mr langsam macha,
sonscht passieret ganz domme Sacha!

Selbscht d'Rentner hen koa leiblicha Ruah,
hen viel em Haus ond Garta zom toa.
S'isch viel liegablieba - em Schtreß der vergangena Zeit,
wia i frühr - nebaher - enns G'schäft ganga be - mir ewig a Rätsel bleibt....!

I hau Angscht - daß dr Schtreß nemmt ni a End,
erscht - wenn da em Sarg liegscht - mit g'faltete Händ'.
Doch - wirsch no plötzlich wiedergebora -
hosch da Kampf mit am Schtreß scho wieder
verlora!!!!!!!!!!!!!!!!