A kataschtrofaler Urlaub

Sommer, Sonne - Urlaubszeit,
kofferpacka - ond naus onder andere Leit.
- Doch bevor es soweit isch,
sitzt d'Familie om da Tisch.
Reisekataloge - stapelweise,
für große ond au kleine Preise.

Dr Vatter will quer durch Griechaland,
d'Muater liaber ihr Ruah am Schtrand.
D'Kender ganget bloß no mit,
wenn irgendwo Ballermannäktschen ischt.
Dui Entscheidong isch a harter Kampf,
se schtreitet ond schtandet guat onder Dampf.
Z'letscht isch mr übereigekomma,
s'wurd dr Fliager noch Mallorca g'nomma.

D'Muater hot für Älle buacht,
ond em Lada a Menge Reiselektüre g'suacht.
Dr Vatter hot koa Sonnabrill
ond d'Tochter an nuia Bikini will.
Dr Soh' isch aus de Shorts rausg'waxa
ond macht deswega arge Faxa.Endlich send d'Kloider älle parat,
- d'Muater emmer no viel Ärbet hat.....!

Se hot de ganz Wohnung uf Vordermann brocht,
weil d'nasaweis Nochbere doch an Hausschlissel hot.
Daß dui jo nirgends verzähla ka:
"Bei deane hots ausgseah - mei liaber Ma!"Bei Oma ond Opa sagt mer au no ade,
b'hüat euch Gott bis zom Widerseh'!
Mir ruafet mol a - ond froget wias goht,
ob älles en Ordnong - ond s'Häusle no schtoht.

Jetzt isch so weit, dui Taxe wartet,
dr Vatter lauft nomol durch da Garta,
d'Muater goht durch s'ganze Haus
ond ziagt überall d'Schtecker raus.
(Vom G'frierschrank au, doch des merkt mer erscht schpäter,
des isch a arger - teurer Fehler!)

Endlich uf am Flughafa a'komma,
hot mr da Platz en ra langa Schlang' eig'nomma
ond - weil mr net richtig gucka ka,
stellt mr sich am falscha Schalter a.
Dia Leit drvor ond au drhenter,
wellat noch Kreta mit ihre Kender.
Irgendwann hen se ihrn Fehler blickt
ond sen mit ihre Koffer en dr richtiga Reih' ganz noch henta g'rückt.

Endlich am Schalter -war's schau wieder letz,
s' gab koine vier zammahängende Plätz....,
jeder sitzt en ra andera Reih,
aber mr fliagt jo bloß anderthalb Schtond - was isch drbei!
Jetzt schnell durch d'Kontroll mit am Handgepäck,
- koi Angscht - mir hen koa Bomb verschteckt!
Endlich durch - jetzt hoast's wieder warta,
en ra schtarka Schtond soll der Fliager schtarta.

Z'mol taucht an dr A'zeigtafel a Hinweis uf-
wegam Busfahrerschtreik en Mallorca derf koi Fliager en d'Luft!
En Palma käm mr nemme weiter
ond so verzöger' sich der Schtart om Schtonda - leider!
Wia brengt mr dui Zeit rom - s'isch net grad fei,
de meischte Leit schtrömet en Djutifrimarkt nei.
De Andere trenket den dr Cafeteria,
zur Urlaubseischtemmong a Glas Sangria.

Endlich isch dui Warterei rom,
ond mr fliegt noch Mallorca nom.
Dia Busfahrer schtreiket emmer no,
mr wartet weiter s'isch halt so.
So noch weitere vier fünf Schtonda
hot sich a frei's Taxi g'fonda,
mo ens buachte Hotel g'fahra ischt,
doch do war's scho wieder Mischt.....!

Dia bschtellte Zemmer waret zwoimol vergeba,
vor Zorn könnet se sich kaum no heba,
se sollet halt de nächschte zwoi Wocha,
zo viert emma kloina Personalzemmer hocka.
S'oinzig Feaschter goht en Hof henta naus,
s'schtenkt dauernd noch Fisch, mr hält's kaum aus.
Dusche ond s'Klo send draußa auf am Flur,
zur kloina Entschädigong kriagt jeder a Taucheruhr!

Also wenn des so weiter goht,
nia wieder dr Senn noch ra Urlaubsreis schtoht....!
Doch - endlich fangt d'Erholung a,
mr ißt ond trenkt - so viel mr ka,
weil schliaßlich - als Pauschalturischt,
d'Vollpensio schau zahlt gwea ischt.
Mr schwemmt ond bummelt - ruaht sich aus,
schnell isch dr Urlaub rom, s'isch grad an Graus!

Dr Busfahrerschtreik isch fascht vergessa,
morga tuat mr wieder drhoamta essa,
eikaufa muaß mr au net glei,
do langt mr oafach en G'frierschrank nei.....!
Dr Flug war guat - mr glaubt es kaum
ond Älle send ganz knackig braun.
Doch am Gepäckband dauerts Schtonda,
bis sich rausschtellt, oi Koffer isch verschwondaond falls mr'n nemme fenda duat,
häb mr a Entschädigong guat!

Mensch - des waret Chaotische Wocha,
was hot dui Familie bloß verbrocha?
Jetzt schnell hoam - do isch älles guat-
oder - was dia do erwarta duat?
S'Haus ufschliaßa - mr goht nei,
oh - do riachts grad net so fei.....!
D'Bloamaschtöck send äll' versäuft
ond dr Alarm vom G'fierschrank pfeift......!

Noch zwoi Wocha Paella ond andere mediterane Sacha,
will d'Muater schnell a paar Kartoffelpuffer bacha.
Em G'frierschrank isch a Packung dren,
doch - wia se ufmacht, verschlecht s'ra d'Schtemm.
Älles isch he - nex mai ka mr braucha,
voll Fruscht sieht mr de ganz Familie en a Pizzeria laufa.
An dean Urlaub denkt koiner gern z'rück,
doch em nächschta Johr probieret se wieder ihr Glück!