Hektik en dr Weihnachtszeit

Hektik en dr Weihnachtszeit,
ja muaß des sei - ihr liabe Leut?
Schnell no nei - ens Kaufhaus laufa,
irgendwelche Gschenkla kaufa.....!

Sprudel - Saft- Sekt - Bier ond Wei,
sott grad gnuag em Keller sei......
Gmias ond Fleisch - Obscht ond Brot,
kauft mer - alls gäb's de gröscht Hongersnot!

Bredla bacha - guat verschiaba,
Weihnachtsliader nomol üaba!
D'Feaschter butza - d'Schtub abschtauba -
no soooo viel Gschäft - s'isch et zo glauba!

Chrischtboom kaufa - en dr letzschta Schtond,
schtreita über's schmücka - oafarbig oder bont!
Beleuchtong kontrolliera - koane Ersatzbira do,
no macht mer halt mol wieder echte Kerza na!

D'Chrischtboomschpitz - dui isch au he,
"ohne" Lametta isch dr Boom wonderschee!
Endlich sitzt mer am feschtlich deckta Disch
ond merkt - wia miad ond g'schafft mer isch...!

Am liabschta dät mer a Weile d' Auga zuamacha,
doch z'erschta muaß mer d'Chrischtkendla auspacka.
Mer freit sich über dia Gschenkla - oder au net -
wia schee wär's jetzt em warma Bett!

Morga geits a Gaas - ond no mei so guate Sacha,
muaß mer sich eigentlich - bloß weil Weihnachta isch -
sooo viel extra Gschäft macha?
I nemm mir's fescht vor - laß mi nemme so schtressa.....,
doch - bis nächscht Johr - isch äll's wieder vergessa!