Schock am Niklasobed

Mit fenf war i a rechter Fledrawisch,
dem s' brav sei richtig schwer gfalla isch!
S' ganz Johr hot mer mir mit am Niklas droht:
"Was saisch - wenn der Di noch am liab sei frogt?"
"Wahrscheinlich schiabt er Di en Sack,
aber vorher verhaut er Dir da Frack!"
I hau s' et glaubt ond dri' arg glacht,
mir absolut koane Sorga gmacht!

No - s' isch am Niklasobed gwea,
hot s' an dr Dür Gepolter gea,
do isch er gschdanda - der grauße - bärtige Ma,
schüttelt da Kopf ond guckt mi blos a!
"Wia Du siehsch - mei Sack isch leer,
was i jetzt doa muaß - fällt mir schwer!"
I hau et schnell gnueg gucka kenna,
schau war i en deam Sack do drenna!

Hau gschria ond bettelt: "Laß mi raus!"
- Doch der drait mi zor Hausdür naus!
Am Hauseck vorna - stellt er mi na,
macht da Sack uf - guckt mi schtrofend a:
"So ebbes wia Di - ka au i et braucha,
verschprichsch daß de bessersch - no laß i Di laufa!"
Zittret hau i wia Eschpalaub
ond mi ganz schnell gmacht aus am Schtaub!

Wochalang hau i nemme richtig schlofa kenna,
dui Angscht war no johrelang en mir drenna!
Oas hau i mir gschwora - mei liaber Ma -
so ebbes dua i "meim" Kend nia a!
Dr Niklas ka vo mir aus durchs Kaufhaus schprenga
ond dort de Kender Gschenkla brenga.
Weiter will i koanerlei Kontakt,
höchschtens da Schtiefel fülla über Nacht!