Voglgribbe

Jeden Morga frai i mi,
übers Voglzwidschra wia no nie.
Wia lang wurds sai, daß mers no hörd,
bevor d' Voglgibbe älls zerschdörd?

Am Negger sieht mer nia mai Reiher,
koan Kuckuck hairsch mai sein Nama schreia!
Am Meer geids koane Möwa mai,
koa Gaas, koa Eed, koa Schwaa em Sai!

D'Innaschdädt send uf oan Schlag
erlöst vo dr schlemma Daubablag!
Koa Schwalb zeigt mai da Sommer a,
koa Nachdigall mai schlaga ka!

Ed a mol oa frecher Schbadz
ssch... em Goedhe uf sei Gladz.
Amsla, Drossla, Schbecht ond Eula,
miaßet schderba - s'isch zom Heula!

Rodschwenzla, Meisa, Fenk ond Schdar,
aus isch mid dr Voglschar!
S' Oziefer nemmd schnell über Hand,
giftschbridza wurd erlaubd em ganza Land!

De überlebend Voglschar
guckd mer en dr Wilhelma a!
Göggala, Subbahoa ond Frühschdüggseier
vo gsonde Viecher - wern bschdemmd deier!

Was ka mer doa - wia ka mer helfa?
Schlägds für d'Nadur jetzt grad schau zwölfa?
Mr hädd solla de Zugvögl s' wegfliaga verwehra,
en gheizde Halla - Asyl gewähra!

I hoff, daß mr an Weag aus deam Dilemma fend,
bevor dr Virus uf d' Menschheid überschbrengd!
Liaber Herrgodd - mir bidded Dich:
"Laß oos ond d'Vögl ed em Schdich!"