Quizshows - oder allzuviel isch o'gsond!

Wann i schalt mein Fernseher a
fanget scho morgens bald, dia Quizshows a.
Em Tm3 kasch ganztags g'wenna,
om siebene muasch de über d'Urlaubsziel b'senna,
om zehne goht's om älle Tiarla uf dr Welt,
om zwölfe - om dia Leit mit Geld....,
om zwoi "Time out" - a Sekondaquiz,
om viere dann "Das Urlaubsglück",
kurz noch achte hoißt's "Greif an!"
des isch für Älle - ob Frau oder Mann!

S'RTL hält au guat mit,
do hoißts nachmittags: "Der Schwächste fliegt!".
Fascht täglich kommt's "Familiaduell",
em "Ouiz Einundzwanzig" g'wennt mr au ganz schnell.
Dr Günther Jauch frogt: "Wer wird Millionär?",
dia Froga send manchmol richtig schwer.....!
Wenn da nix woisch - duasch dei "Quizfire" en da Keller fahra
ond SAT 1 a Haufa Geld verschpara,
ab sechse kasch beim Clerici en dr "Quiz Show" schpiela
ond an Batza Geld erziela!
Em Kabel 1 kasch s'Glücksrad dreha
oder mit am Jörg Draeger "auf's Ganze geha!"

Mr merkt, ganz schlecht isch om oser Allgemeinbildong net bschtellt,
b'sonders wenn mr g'wennt viel Geld.
I frog mi blos - mo kommet dia G'wennsomma her,
doch do druf z'komma isch net schwer.....,
jede Sendong wurd öfter durch d'Werbong onderbrocha,
des brengt d'Zuaschauer - ond b'sonders mi zom Kocha.
Viel, viel Geld koscht jede Werbeminut
ond an Toil fließt dann an d'Gwenner z'ruck.
Kauft mr a Los bei "Lotto - Toto - SKL,
g'wennt mr täglich au ganz schnell.
So dronternei - do kommet no
"Aktion Mensch, Glückspirale ond Lottoshow"

Rätsel - Quiz - zo jeder Stond,
i moin: " Allzuviel isch ogesond!"
Irgendwann wurd's de Zuaschauer z'viel,
no erfendet dia "F e r n s e h m a c h e r" halt a neues Schpiel!