Politikmüdigkeit

Täglich hört mer en Funk ond TV
oserm Schtaatsetat gohts furchtbar mau.
Schteura - Kürzonga - Praxisgebühr,
i frog d'Regierong:" Was denket denn Ihr?"
"Mir send doch koa Kuah - mo mr endlos melka ka,
fanget doch erscht mol bei uich selber a!"

Drei Monet em Johr - für Älle gleich viel Geld,
do wär's om da Schtaatshaushalt bald besser geschtellt.
No wüßtet dia Obere - mit ihrm "Supergehalt"
endlich au mol - wia mr da Gürtel enger schnallt!
I glaub - dia hen jegliche Relatio verlora,
net jeder isch mit ra goldena Naas gebora!

Die mo moanet - s' Volk schafft et lang gnueg,
wißet meischtens net - wias als Fabrikarbeiter duet.
Wenn da arm bisch - muasch halt früher schterba,
was da g'schpart hosch - duet dr Schtaat no erba!
S'isch koa Wonder, daß de Leut s'Vertraua fehlt,
wenn mer täglich ebbes Anders verzählt.

Über d' Kritik vo dr Oppositio ka i bloß lacha,
mit dr Gosch - ka mr leicht älles besser macha!
S' Geld mo et do isch - könnet au dia et verplana,
des Abgaba-Kend hot no halt an andera Nama!
I ka des "Pleitegeheul" langsam nemme höra,
schalt d'Nochrichta ab - deant mi jo et schtöra!