Schaugts!

Schaugts! Was is denn beim Simmerl seim Stoi
für a seltsamer Schein auf amoi,
für a Glanz, für a inwendigs Liacht?
So a seltsams, daß i mi fast fiacht!


Sappradi, ja, da werd's doch net brenna?
Laff mer hi, daß mer 's Viech retten kenna!
Weil der Ochs, der steht auf jedn Foi
über Nacht doch beim Simmerl im Stoi!


Naa, naa, Waste! Der Schein is koa Feier!
Aber trotzdem durchaus net geheier!
Sixt den Stern überm Stoi in der Heng?
Hast du so an Stern scho amoi gseng?


Auweh! Sterngucker, schmeck's, was des is!
So oan hab i no nia gseng, ganz gwiß!
In dem Stoi gschiecht was, des sag dir i!
Sepp und Korbe, was is: schau mer hi?


Mir sagt koaner nach, daß i mi fiacht!
Vor koam Wei und erst recht vor koam Liacht!
Bloß: wenn i des Geringste riskier,
putzt mei Oide mi zamm, und des wia!


No, du werst so a Simandl sei!
Überhaupts: ees seids Helden! O mei!
Aber oiwei am Stammtisch groß toa!
Na bleibts da hoid und i geh alloa!


Naa, riskiern tua i nix, auf koan Foi!
Schließlich is's ja am Simmerl sei Stoi
und net meiner. I bi do net bläd!
I schaug, was in der Zeitung moing steht.


Griaß eich Gott mitanand, Hirtaleit!
Angst brauchts koane ham, vuimehr a Freid!
Gehts no hi zu dem Stoi, trauts eich no!
's liegt was drin für eich. Schaugts es eich o!