Mit der Eisenbo

Gern zuggfohrn bin i meiner Lebdog scho.
Und is's ned aa wias Lem? Stazionen streichan
vorbei, Städt, Fäider, Berg, und an de Weichan
verzweigt se's; jäder fohrt noch anderschdwo.

De Fahrgäst im Abteil: kaam gwohnst de dro,
steings aus und eahna Sitzblotz gheat de Neichan,
de eahna Zui erst spät noch dir erreichan -
obwoi mer gwiß dees aa ned wissen ko.

Diam werd's ganz finster: des is a Tunnäi.
Dua di ned owe: 's werd scho wieder häi!
Diam host an Aufenthoit, nix gäht voro.
Dafia fohrt anderschdwo der Zug vui z'schnäi.

Diam schreid mei Oide: "Kimm zum Essen, Mo!
Du Kindskopf, spuist scho wieder Eisenbo?!"