A Drumm Dreibhoiz

A Drumm Dreibhoiz

(aus de Häglwerther Säsoneddl)


Der Gwitterschdurm vo gestern nammidog
hod von am Baam an dickn Ast ohgrissn
mid seiner Gwoid und bis in'n Sä neigschmissn.
Iatz is er a Drumm Dreibhoiz auf oan Schlog.

Der Herrgod machd mid oam hoid, wos er mog.
Wofier's zletzd guad is, werd er säim scho wissn.
Drum sieg dei Schicksoi, Mensch, ned so verbissn.
"I bin hoid aa bloß a Drumm Dreibhoiz", sog.

Am Baam dro waar der Ast vialeicht a Siz
vo Schbozn oder Daiberl gwen amoi.
An Fisch gseng häd er dort auf gor koan Foi

und Schwana kennaglernd. Es is ned immer
a Schdraf, ois Dreibhoiz umananderschwimma.
Und irgendwann triffd jädn moi der Bliz.