Aufs Loch zua

Aufs Loch zua

(aus de Häglwerther Säsoneddl)


Nix auf der Wäid is wia de Zeid so schdreng,
hod a anddicker Filosof scho gschriem.
Rechd hoder: wia a Viech werst vorwerdsdriem
von ihrer und koan Mux konnst doa dageng.

A Menschnleem hod sei beschdimmde Leng
unds Schderm am Endd is koam derschbard no bliem.
Zerschd werdsder ned so unterd Nosn griem -
bisd nimmer konnst wia friarer. Dann werds eng.

Dann merkst: Aa di dreibds auf des Loch do zua,
des Dierl, de Pfortn, wo no koaner gwieß
dir song hod kenna, wos dahinter is.

Der Brandner Kaschber hod ins Paradies
ja neigschaut - aber mei: a Buachfigua ...
De Dichter liang ja aa in oaner Tua.