Vum Geh mid der Zeid

Vum Geh mid der Zeid

(aus de Häglwerther Säsoneddl)


I hobs weggschmissn iatz, mei rosarode,
i trog iatz bloß no de ganz schwarze Bruin.
Damit i nix mehr seng muaß von dem vuin
Modernsei: Oiß is "Fortschritt", neiste Mode!

Dawei schaug's o, de Wäid, de z' doud marode,
mid der a boor Hanswurschdn Kaufloon spuin!
Vui z'langsam moins, am Herrgod seine Muin!
Gwarnt hamm oa! Aber head heid wer auf Dode?

Mir miassn mid der Zeid geh! Immer schnäier!
Und wäidweid Nummer Oans sei, "Gloubl Bläier"!
Wer auf der Schdreck bleibd, ghead der Katz, wäidweid.

Und immer mehrer ghean zu de Verlierer.
Dees is hoid so beim "Fortschritt". Scheiß auf friarer!
"Fort-schritt", dees hoaßd: mir gengan - mid der Zeid.