Liegewiesndischkurs

Liegewiesndischkurs

(aus de Häglwerther Säsoneddl)


"Sie, Herr! Sie, hean'S amoi: dees ko ned schdimma!
Wia kaamerdn auf oamoi Sie do her?
Do drent is no de hoiwe Wiesn leer.
Und dees do is mei Liegebloz, scho immer!"

"Iatz sie schaug o, des dammesch Frauenzimmer!
Dee buit se grod ei, sie waar woaßgodwer!
Wer zerschd kimmd, moid zerschd! Gengan, biddesehr,
hoid Sie do nüwer - oder gengan'S schwimma!"

"Sie Lackl, Sie! Verschwindn'S, und zwar glei!"
"Sei schdaad, du Bißgurn! Foit mer gor ned ei."
"I schwimm zum Bademeister dort, pfeigrod!"
"Dersauf ned unterwegs! Um di waars schod."

Ma glaubd ned, wos am Sä de Wiesn fei
scho gleichgesinnte Herzn zammgfiehrt hod!