De Krah auf der Krippn

Ja, Ox und Esel, ihr seids hoid de Blädn!
Ohdraht muaßt sei, so wia de Krah: de hockan
iatz fett auf eirer Krippn und frohlockan.
Zwar daad des Fuader glanga fier an jädn -

bloß hamm de Krah hoid Führungsgwalidädn
und schnappan se, wos gähd. Eich bleim de drockan
Brodrindl und de hartn, zaachn Brockan -
obwois aa dee fast säim no gfressn hädn.

Ja, Ox und Esel: laßts de Krah eich drästn!
Laßts eich verzäin von eahna, daß beschdimmd
zu eich, wennz moants, iatz is de Not am gräßtn,
des Griskindl auf Bsuach, wia damois, kimmd.

Wos sogts? Es daad scho not? Is fast scho z'schbäd,
daß's kimmd? - Mei, Ox und Esel, seids ihr bläd!