Voiksmusik

I bin a Freind der Voiksmusik:
dees is Musik fürs Voik!
Grad zümpftig is's, die Voiksmusik,
und zümpftig der Karl Moik!

Da singans Liader von die Berg
und sittsam von der Liab!
I waar von der Andrea Berg
gern selm der Herzensdiab!

Und wenn dann aa no Bloskappäin
recht zackig paradiern,
na möcht i fast mei Bier wegstäin
und säiber mitmarschiern!

Alloanigs in der Voiksmusik,
da is die Wäit no heil,
da scheint no d' Sunn, da lacht no 's Glück!
Sonst tuat's ja 's Gegenteil...

Drum laß nur von der Voiksmusik
i blasen mir an Marsch.
Zu dem Gschwerl in der Politik
sag i: "Leckts mi am A... uwehzwick!"

Bloß wenn mei Zenz, mei bestes Stück,
mir schreit, na muaß i hörn -
hör im Vergleich zur Voiksmusik
i sie aa net so gern.

Doch kriagt am Abend in der Stum
mei Zenzerl ihrern Blick
und kommandiert: "Ins Betterl, kumm!" -
dann spuit dort - d' Voiksmusik!