Boodsartn

Boodsartn

(aus de Häglwerther Säsoneddl)


Des Bassaschierschiff fohrd mid am Moddoa;
do miaßn olle andern aus der Bo.
Schaug hi: do schdrengd se oaner machdig o,
der ruaderd in seim Ruaderbood alloa.

Im Dredbood schdrambben midanander zwoa
und kemman drotzdem langsam bloß voro.
Vui gschwinder gähds mim Seglbood zwar scho,
doch brauchst an Wind und host grod gnua zum doa.

Fiers Schlauchbood guit, wia aa fierd Lufdmadrazzn:
Es derf hoid in der hoaßn Sonn nix blatzn.

Wia er durchs Wasser kimmd, so oder so,
hod jäder Mensch sei eigne Schdraddegie.
Wos mi bedriffd: wenn i zum Bohn gäh, i
leg mi am Ruckn und mach "doder Mo".