Am Wasser seine Boikn

Am Wasser seine Boikn

(aus de Häglwerther Säsoneddl)


Wia wenn im Sä a kloaner Danzboon schwimmerd,
so schaung de Bredl aus. Es is koa Floß,
es fohrd ja ned, es liegd ganz schdaad do bloß:
auf Fassl a boor Boikn zammazimmerd.

Wenn's Wasser bis zum Hois eahm schdäht, na klimmerd
woi mancher gern auf so an Rastbloz, wo's
eahm nimmer noß neigähd. Doch wer scho ko's?
Wer hod se vorher um so Bredl kimmerd?

Ko sei, des Hoizdrumm schwimmd - i woaß's ned gwieß -
agratt do, wo der Sä am diafstn is.
Wer hischwimmd, legd se meistns drauf ind Sonn -
und doch: fois oaner wirklich nimmer konn ...

Is's Zuafoi, daß ma's grod von dera Schdäin
am bestn siegd, am Gloster sei Kapäin?