Der Bloz an der Sonna

Der Bloz an der Sonna

(aus de Häglwerther Säsoneddl)


Wennsd außerkimmst vum Woid, na fiehrd des Schdreckerl
zum Gloster niwer iwers Fäid: Herent
und drent koa Baam mehr, der an Schaddn schbendt.
Do schwitzt wia in der Bachrean drin a Weckerl!

Vialeicht häd grod so gern a schaddigs Fleckerl,
wen Dog und Nachd des Bresseblizliachd blendt,
des "Liachd der Öffndlichkeid". Brominent
sei schdrengd auf Dauer sicher o a Breckerl.

Nadierlich dringan aa de "Schdaars" dafier
an Schambbus, wenns an Durschd hamm, statt am Bier
in irgendoaner Nobl-Disko z' Minga.

No ja, dees Gsief, dees gunn i eahna gern;
dees schmeckd mir äh ned. - Und von dene Herrn
daad mancher aa - moan i - Bier liawer dringa.