Hiagsteikehr am Sä

Hiagsteikehr am Sä

(Der Karin und am Hans gwidmet)


Iatz kehrt der Hiagst ei und der Sä werd schdaad.
De Badegäst und Urlaubswandrer fäin.
Bloß no der Woid rauscht und der Wind macht Wäin.
Dem oidn Schwan is fast a bisserl fad,

der oazäin aufm Sä sei Rundn draht.
Untriabter sprudeln iatz inn Sä de Quäin.
Häi klingt des Glöckerl vu der Säkapäin,
des woach der Wind ans drenter Ufer waht.

Vor am Marienbuidl an am Baam
hod wer a Grobliacht ozindt, grod ois kaam
scho Allerheiligen und Allersäin.

So schnäi vergäht der Sommer, oider Schwan!
Schaug hinter di, wo'sd gschwommer bist, de Bahn:
Boid schluckt der Sä aa deine letztn Wäin ...