Schwanagsang

Schwanagsang

(aus de Häglwerther Säsoneddl)


Ganz ehrlich: i find ned, daß's bsonders klingan,
de Schwana. Aa ned anders wiar a Antn,
wenn's schnoderd. Freilich: Voglkundler fandtn
an Unterschied. Daß Schwana aber "singan" ...?!

Obwois den Schwanagsang ja erschd voibringan,
wenns gschbiern, daß's boid scho nimmer dosei kanntn.
Der Doud macht's - dees find i an intressantn
Gedankn -, daß sie z'häxt se auffeschwingan.

Und weil der Schwan bekanntlich a Simboi is
fiern Dichter, muaß i song: Do is wos dro!
I schreib ja säim gern Verserl, und i ko
am bestn dichtn, wenn mer ned recht woi is.

'S Endd wenn i amoi zurakemma ahn:
do wer i singa erschd! Mei liawer Schwan!