De Eikehr danoch

De Eikehr danoch

(aus de Häglwerther Säsoneddl)


Wennsd ummergwanderd bist na um an Sä,
vorm Gloster wieder schdähst noch deiner Rundn,
na host ois Mannsbuid gern an Durschd, an gsundn,
und d' Weiwerleid meng Kuacha und Kaffä.

Drum hod beim Gloster glei ganz in der Näh
a Wirt an idealn Schdandort gfundn.
Ja, Geist und Körper sann hoid eng verbundn:
"Mens sana" undsoweider, woaßters äh.

Hod ned grod desweng seinerzeid a Engerl
im Himme gor se eschoffierd a wengerl,
weil's bloß a Manna gem hod und koa Bier?!

Dees hod se g'enderd, glaab i gwieß. Und kimme
noch meiner Wandrung do herunt inn Himme,
sog i zum Bädrus glei: "Mi dirschd, und wia!"