Zwiderwurzn

Zwiderwurzn

(aus de Häglwerther Säsoneddl)


Kaam gähst, wia i, ois Schdodmensch ausm Haus,
na rumbben dir scho hunderd Leid entgeng.
Und zwider dreischaun dean dabei ned weng.
Koa Wunder bei dem Grach, dem Saus und Braus!

Der Heckdick kimmst hoid in der Schdod ned aus.
Wosd hischaugst, iweroi is a Gedreng.
Und jäder Zwoate machd a Gsicht desweng,
ois lafferd iwerd Lewer eahm a Laus.

Diam bleib i schdeh fier an Momend, an kurzn,
und deng mer: "Woher kenn i iatz des Gfries,
des grantige, vu derer Zwiderwurzn?"

Ko sei, daß's mir am Sä begegnet is.
Obwoi de Baamschdimpf dort oft lustig schaung.
Bloß ganz de zwidern scheinds aa do ned z'daung.