Der Sä ois Filosof

Der Sä ois Filosof

(aus de Häglwerther Säsoneddl)


Der Sä verlandt, dees hoaßd: er schdiabd dahi.
Es dauerd no a Zeid, na gibds'n nimmer,
na werd koa Schwan mehr und koa Fisch drin schwimma.
Woaß oder gschbiad der Sä dees?, frog i mi.

Weil er so ruig, vui ruiger is wiar i.
Wenn's so der Herrgod wui, na werds scho schdimma,
denkd er se. Und i reg mi auf und kimma
mi owe. - Schderm muaßd! Unter Garantie!

Er lachd, wenn d' Sonn scheind, aber machd koa Gfries
aa ned, wenn's rengd amoi und diasig is.
Er laßd jäds Johr Turisdn zu sich kemma
wia gloane Kinder und in sich drin boon ...

Grod weil er schdiabd, der Sä: es kannt ned schoon,
i daad mir do an eahm a Beischbui nehma ...