'S Sänixerl (Diam deng i no an Di)

So wanderst hoid dein Weg im Leem dahi:
es gäht bergauf, bergo, is säitn eem.
Aa wenn se scheene Ausblick diam ergeem -
z'meist sixt vor Baam an Woid ned; ßellawie.

Und drotzdem sammed se a Galerie
Erinnerungen o schee schdaad im Leem:
Erinnerungen, de dei Herz erheem
auf äwig. - Ja, diam deng i no an Di ...

Ois wiar a Nixerl dauchst dann ausm Sä
seim diafstn Grund auf oamoi wieder auf,
so buidhaft, daß i schdehbleib und verschnauf.
Ja, es duad oiwei no a wengerl wäh ...

Ned jädm is a Wandersgsäi vergunnd.
Mir wart a Nixerl aufm Sä seim Grund.