Rußland und i

Iatz hoaßt's ja nimmer Rußland, sondern Gus.
Und aa de oide Feindschafd is bassä,
meim Großvadder sei Gschicht a oider Schmäh,
sei Gfangaschafd fünf Johr im Kaukasus.

Doch leider, leider sann's iatz aa zum Schluß
Kabbidalisten worn! Und i verschdäh
aa ned, wia ma fast 's ganze Johr an Schnä
derlein ko. - Naa, i waar koa gscheider Ruß.

Nix gegan Dostojewski und Gontscharov,
Tolstoi, an Puschkin, Tschechov, Lermontov...!
Aljechin, Smyslov, Karpov und Kasparov,
von dene wo i Schach zum lerna hoff...!

Hundd sann's scho, d' Russen! Bloß des Oane hoid
verleidt mir Rußland: i find's einfach z' koid.