Wiara Fisch im Wasser

Wiara Fisch im Wasser

(aus de Häglwerther Säsoneddl)


Vom Brickerl iwern Säarm aus konnst guad
de Fisch schdudiern: wias schiaßn greiz und quer;
grod gnädig hammses, es is a Verkehr
wia aufm Schdachus bei der suiwern Bruad.

Und wia aa no der kleanste wichdig duad!
Fier eahm is do sei Bisserl Sä a Meer,
sei Wäid, so kloa's aa is. Wos woaß denn er
vum Ozean, vo Ebbn oder Fluad!?

Wennsd zuaschaust do vom Brickerl aus, na lachst,
weil jäder se so oweduad do drin. -
Merkst ned, daß du im Grund nix anders machst?

Bist ned aa du den ganzn Dog am Schwitzn,
schwimmst hi und her in deiner kloaner Pfitzn
und host fiern groußn Ozean koan Sinn?!