Hoamadgfui

Hoamadgfui

(aus de Häglwerther Säsoneddl)


Ja, freilich is's bloß a Gedankngschbui,
a Schnapsidä bloß - aber gwieß koa schiache ...
Diam draam i aa, i waar no kloa. Na kriache
im Säwoid ummanand und schwanz de Schui ...

Der Woid, der Sä, des Gloster do: so vui
kimmdmer bekannd fier. Aus am Kinderbiache?
Her stamm i ganz woandersd. Drotzdem riache,
schmeck, gschbiere do am Sä a Hoamadgfui.

Vialeicht is wirklich ja nix Bsonders gwesn
und i hob einfach in am Buach wo glesn,
scho ois a Kloaner, vo am soichn Sä.

Vialeicht, daß aber Säin aa Baama gleichan,
wo oft bis z'weidersd weg de Wurzln reichan ...
Bloß a Gedankngschbui, a Schnapsidä ...