Grobschdoana

Grobschdoana

(aus de Häglwerther Säsoneddl)


Der Innenhof vom Gloster, ganz a gloaner,
zoagd an de Haisermauern rundum Leid:
De Glostervorschdent aus der friarern Zeid
schaun schdreng im Hoibreljeff di o - ois Schdoana.

Hochwichdige Personen, kannt ma moana!
Doch wer erinnerd se an sie no, heid?
Es lasserd hoid so gern fierd Äwigkeid
der Mensch sei Schbur do - aber dees ko koaner.

Ob Kaiser, Kienen, Faidherrn Griage fiehrn,
ob Äbde so a Gloster bloß regiern,
ob oaner Ruhm suachd wia der Heroschdrat:

A schdoanerns Denkmoi mengs der woi schbendiern -
dees endert nix dro, daß dei Nam verwaht.
Und Wind und Reng boliern dein Schdoa schee schdaad.