Der oide Kindskopf und sei Gripperl

D' Maria rechts und auf de ander Seitn
an Josef. Ox und Esel schaung recht bläd,
weil eahna Grippn do zum Fuadern schdähd
und ned zum Kinderneileng, Herrschaftzeitn!

Iatz no de Hirtn, de zum Schdoi hi deitn,
weil offenbar wos Scheens dort vor sich gähd.
Und weider weg am Berg – de kemman z' schbäd –
drei Kienen, de dem gschwoaftn Schdern nochreitn.

Zletzt des Ladernderl oknipst no im Schdoi,
dann is des Gripperl fertig – oi Johr wieder.
Is's aa inzwischen scho a bisserl schieder:
fäin derf des unterm Gristbaam auf koan Foi.

Obwoi im Grund i Kindskopf ja scho vui,
vui z' oid bin, daß i mid am Gripperl schbui ...