Kerznschicksoi

Schaug her, wia leichd a Kerznflamm verlischd:
Es konn der Dochd schee schdaad im Wax derdringa,
es kennan aber aa zwoa gschleckde Finger
zuadrucka gschwind, daß's kurz bloß rauchd und zischd,

Dier aufgeh, daß a Windschdouß driwerwischd ...
Dawei werd 's Kerzerl äh von säiber gringer:
Dahigeh duad's! Aa mir warn friarer jinger,
hamm gschdroid, ned bloß im driabn Wax drin gfischd ...

Des is hoid des, wos mir ned ändern kennan:
daß mir schee schdaad, wia Kerzerln, owebrennan.
Des wuiderst Flackern häift nix; gib a Ruah!

Aa du kimmst auf den groußn Schdummehaufa.
Wennsd Glick host, werd dei Dochd schee schdaad dersaufa;
wennsd Bech host, druckan d' Finger friarer zua.