Ausglaffa

Ausglaffa

(ogloand an de Häglwerther Säsoneddl)


Ausglaffa is der Sä, sei Beckn laar.
Und ohne Wasser ko koa Fisch ned schwimma:
A boor no zabben, aber boid scho nimmer.
Umbringa ko ma ned bloß mid am Gwahr ...

In letzder Zeid kimmds mir so vor, ois waar
aa i a so a Fisch. Es mog scho schdimma,
daß's andre gibd, de beidld 's Leem no schlimmer -
mir foids hoid drotzdem wia no nia so schwaar.

I sieg koan Sinn mehr in dem Owezabben.
Zu wos soi i mi jädsmoi nei derrabben?
Daß i mi um oa Heisl weiderzaar?

"Gäh weider! Deng an Häglwerther Sä!",
songs, weil i schdehbleib und ned weidergäh. -
Ausglaffa is der Sä, sei Beckn laar ...