'S Boodshaus

Schaud's ned verschwieng aus und geheimnisvoi,
am Sä des Boodshaus? Warum hamms dees baud?
Warum woins, daß do koaner eineschaud?
Versteckans drin a Schmugglguad vorm Zoi?

Zum Oleng glangerd bloß a Steg doch woi!?
No ja, fiern Reng vialeicht ... Ma heat koan Laud!
Im Krimi neilich hod se oaner traud ...
Wos gschiecht do drin, des koaner midkriang soi?

Ma denkd hoid bei am so an Boodshaus glei
an Mord und Dodschlog. Doch dees muaß ned sei!
Am End is bloß a Liabsboor drin versteckt,
des mehr ois der, der eineschaud, derschreckt ...
Neigierig? I? Gor nia! - Neamds do?? - Zefix ...

Iatz sowos! A laars Ruaderbood, sunst nix ...