'S Rähkitz

'S Rähkitz

(aus de Häglwerther Säsoneddl)


Du host di dengerschd scho verlaffa, gäi?
Sunst trauerdst di ned her aso zum Sä.
Do sann doch meistns Menschn in der Näh.
Und iatz? Iatz traust di nimmer von der Schdäi?!

Neigierig bist - und jung! Ma siegd's am Fäi.
Bist äher no a Kitz ois wia a Räh.
Schau ned so gschreckd! I dua der gwieß ned wäh;
i bi koa Jager ned, bei meiner Säi!

Iatz schau mi hoid ned gor so bodscherd o!
I woaß ja säim und i berei's ja scho:
Dees war vialeicht von deine groußn Schwestern
gor oane auf der Speisekartn gestern ...

Furt is's! Ois woit's vo mir mei Beicht bloß hean!
Vu sowos kanntst zum Vegedarier wern.