'S Neieste vom Sebbe

Du host glei vorn ums Eck gwohnd in der Lendt
und warst vier Johr in oaner Glass mid mir:
a Nachbarsbua und Freind aa irgendwia.
Mei Oma hod de deine recht guad kennd.

Mir hamm di "Sebbe" und ned "Josef" gnennd.
Drum kimmd mir "Josef" heid so säitsam fier.
Wos noch der Grundschui worn is dann aus dir –
koa Ahnung; unsre Wege hamm se drennd.

Aa weil i wegzong aus der Lendt bin boid.
In etwa warn mir jädnfois gleich oid.
Vialeicht aa desweng hob i heid so gschluckt.

Dei Nam war nämlich in der Zeidung druckt –
bloß eem schdatt "Sebbe" "Josef" Sittenauer.
Zwoa Dechder und dei Frau "in schdaader Drauer" ...