Am Endd zua

Iatz riachds noch Herbst scho wieder und noch Schwammerl,
noch Greidder, wenn i iwern Schdodpark gäh.
Iatz sitz i gern scho wieder in meim Kammerl
dahoam, schau naus, wias rengd, und dring mein Tä.

Iatz sixt den ganzn Dog scho wieder d' Sonn ned
und brauchsd scho fria am Nammidog a Liacht.
Iatz mecht i mi gern gfrein auf wos und konn ned;
obwoi i mi vorm Winter doch ned fiacht.

Iatz laßt se's hoid scho nimmer lenger leigna:
schee schdaad gähds z' Endd mim Johr - scho wieder oans.
Und na beschäfdigst di hoid mid deim eigna -
wei oiß a Endd hod, ned bloß 's Johr alloans.