In der Diafn

In der Diafn

(aus de Häglwerther Säsoneddl)


Am Ufer freilich is der Sä no seichd,
do sixt no bis zum Grund, wennsd eineschaust,
do konnst no schdeh drin, foisd de einedraust,
sixt jädn Fisch, der suiwern außerleichd.

Wer aber woaß, wia diaf er owereichd,
der Sä, in seiner Mittn? Wos do haust?
A Viech wia im Loch Ness, vor dem's der graust?
Des hoamlich in der Nachd ins Dorf se schleichd?

Am Dog, wenn d' Sonn scheind, freilich is er schee,
der Sä; bloß derfst hoid aufn Schei nia geh. -
Wos? Schauergschichtn, de bloß Kinder schreckan?

Wos in der Diafn oft fier Viecher schdeckan,
konnst jädn Dog fast in der Zeidung lesn!
Und olle is der Herr simbaddisch gwesn ...