Ollerwei weider gähds

Ollerwei weider gähds

(aus de Häglwerther Säsoneddl)


Diam hob i so des Gfui, wenn i vorbei-
kimm an am Bangerl: do is grod wer gsessen.
Er hod nix neigritzt, aa nix dort vergessen.
Und drotzdem war do wer, buidt i mir ei.

Unschded und flichdig soi der Mensch hoid sei;
de Zeid zum Bleim wo is eahm knapp bemessen.
Und liegd er dann im Grob, na werd er gfressen
vo Wirmer: es gähd weider, ollerwei.

Ob di dei Weg bergo fiehrd, ob bergauf,
ja gor zum Gipfe: sei ned zu schdoiz drauf!
Es kimmd der Dog, wosd owafoist vom Schdangerl.

Auf Lorbeern hogga bleibst genauso weng
wia in der Dintn. Aa von dir, wersd seng,
bleibt nix zletzt do ois wia a ledigs Bangerl.