Zu zwoat

Zu zwoat

(aus de Häglwerther Säsoneddl)


Wennsd di ned auskennst, host oan, der di loat.
Wenns schdeil bergauf gähd, host oan, der di schiabd.
Wenns gaach bergo gähd und dei Gmiad se driabd,
na host oan, der di auffangt, d' Arm ausbroat,

dir wieder Muad machd mid am guadn Woat.
Und zletzd is's schee, wenn epper um di wiabd,
di oschaud oder olachd rechd verliabd.
Ja, mehrer Freid machd 's Wandern woi zu zwoat.

Bloß gibds hoid aa so säitne Heiling, so
verschroome, mid am so an eigna Gang,
daß wirkle neamds - zumindest ned rechd lang -
beim bestn Wuin mid eahna wandern ko.

Vo wem wern dee dann träst, gloat, aufgfangd, gschom?
Wer woaß? Vialeicht vo oam im Himme drom ...


(Unserm Mädschiggerl zum Geburtsdog)