Schbiaglbuider

Schbiaglbuider

(aus de Häglwerther Säsoneddl)


I woaß, es is a dammische Idä.
Doch diam, wenn ned des kleanste Lifterl waht,
koa Wäin se hebd und 's Wasser is ganz schdaad,
dann schbiagld se des Gloster drin im Sä:

Der Turm is unt und 's Haus is in der Häh;
aa olle Baam und Schdreicher sann verdraht -
ois wenn de Wäid im Sä drin kopfschdeh daad.
Ja - oder ob grod i verkehrdrum schdäh?

Dann kimmd mi gaach a Schwindl o, a wuider.
Zwar woaß i: dees is olles bloß Fisick,
koa Draam. Der schbiaglgladde Sä is schuid.

Und doch: vialeicht hob i des foische Buid,
hamm bloß mir Menschn an verkehrdn Blick
und seng von dem, wos is, bloß Schbiaglbuider!?