Warum i diam auf Boarisch schreib

Aa wenn se dees vialeicht de Breißn dengan:
Mei Boarischdichtn wui sie ned verdreim.
Bloß: Sachan gibt's, de muaß i boarisch schreim,
wei's irgendwia auf Hochdeitsch ned gscheid gengan.

Do sieg i's wieder: Form und Inhoit hengan
beinand. Dawei gaab's hochdeitsch vui mehr Reim -
wogeng se de zig Laudfaßettn streim
im Boarischen und schwaar se bloß vermengan.

Und trotzdem: Boarisch is scharmanter, schmissiger,
herzhafter, hinterkümpftiger und bissiger.
Es hod an Ernst, an feierlichern, strengern.

Und drum gibt's Themen, de an Ghoit verlierertn,
wenn's ned des Boarische ois Form probierertn -
aa wenn's vialeicht dann Breißn ned verstengan.