Der Bricknschlog

Der Bricknschlog

(aus de Häglwerther Säsoneddl)


Der Parkbloz liegd glei newerm Wirtshausgartn.
Wos is? Genehmigmer uns no a Schlickerl
vorm Losmarschiern? Und schau: a hoiber Gickerl
schdandt heid ois Schmankerl auf der Tageskartn!

Nix gibds! I konns doch schließlich kaam derwartn!
Ma siegd ja scho vom Sä des erschde Schdickerl!
Und aa der Woid wart drenterhoi am Brickerl
scho auf sein Häglwerther-Sävernarrtn.

So leicht wenns oiwei waar und iweroi!
A so a Brickerl daad ma efters braucha:
A boor Schritt driwer bloß und einedaucha
in ganz a andre Wäid: in Woid, Naddua ...

Mach d' Aung zua! Schnauf! Gschbierst in der Säi de Ruah?!
Dees is der Sä! Iatz bist herenterhoi.