A so a Zuafoi! (Mittwoch, 16. Mai)

A so a Zuafoi! Gibt's des aa?! Ja schau:
Von meine Säsoneddl de Bremièr
is heid bei meiner Lesung sex Johr her –
sogor no aufn Wochndog genau!

I woaß no: damois war sei Himmeblau
mei Reddung, seelisch. Hoffnung hom is schwer
im Roischdui, mid der Angst, es werd nix mehr,
in Fuaß und Arm an Haufa Drohdverhau.

De Vorbereiddung is a Zirkus gwesn:
I bin de Klinik obgroid auf und nieder.
Zletzt hob i aber doch, samt Buidl, glesn.

Und just sex Johr danoch heid les i wieder!
A so a Zuafoi! – "Zua-" gern, aber "Foi"...?!
Der Roischdui schdähd im Keller ... Toi, toi, toi!