D' Wäid oschaung wiara Kind

Uroid, schnäweiß san d' Baam worn iwer Nachd,
wia i heid fria zum Fenster außeschau.
Vorm Haus der Parkbloz aa is weiß schdatt grau –
d' Mülltonna ned, weil de san iwerdachd.

Hod er se's aiso doch jetz gmiadlich gmachd
bei uns, der Winter! Auf'n Dog genau
zum erschdn Kerzerl! Aber schdrahlend blau
der Himme, woiknlos, und d' Sonna lachd.

Es is bloß Roaf do draußd und no koa Schnä.
I dring mein' Frühschdückshagebuttentä,
zind 's erschde Kerzerl am Adventsgranz o
und deng – obwoi i heid dahoambleim ko –,

ob i ned nammidog in'n Schdodpark gäh:
d' Wäid oschaung wiara Kind – i oider Mo.