Aufm Odysseus seine Schburn

Und wieder nei ins koide Wasser gschmissen!
A Himmefahrtskommando, wo ma d' Finger
am gscheidern laßt davo! Des zum voibringa
a Wunder waar! I hob mi ned drum grissen.

Wos häifts? Iatz hoaßts hoid wieder: d' Zähn zammbissen
und obackt! Nei ins koide Wasser schbringa!
Aa der Odysseus war ned mehr der Jinger …
Der Herrgod werd, wohi er loat, scho wissen.

So mancher muaß, aa wenn er ned recht mog,
Neis lerna no auf seine oidn Dog,
weil d' Wäin sei Schifferl umananderschwoam.

Wia der Odysseus machs: vor nix derschrecka
und neie Inseln, neie Leid entdecka!
Am Endd schbuid ja aa di der Herrgod hoam.