Mei oids Weihnachtskripperl

Aus schaugt's, ois hätt' der Wind des Stroh
vum Doch im Lauf der Johr
schee staad davotrong, grod aso
verwaht wia meine Hoor.

Der Ochs schaugt scho seit Johr und Dog
genau wia i so dumm,
wenn i beim Auspapierln mi frog:
"Scho wieder oa Johr um?"

Der gschwoafte Stern hängt an seim Droht
ganz scheps längst überm Stoi.
Wia oft's 'n aa verbong scho hot:
Fäin derf der auf koan Foi!

So wia der, wo noch Bethlehem
numdeit, der Hirtabua:
Obbrocha is sei Arm, trotzdem:
er gheat einfach dazua!

Der Kaspar hot aa irgendwann
amoi sei Gab' verlorn,
und is vum Christkind trotzdem dann
no ollwei oglacht worn.

D' Maria, unser liabe Frau,
beschwert si mit koam Wort,
is aa von ihram Gwand des Blau
obblattelt do und dort.

Des irrt sie net. Sie bet't und lacht
ihr Jesuskinderl o:
War an dem Stoi vun jener Nacht
doch aa koa Luxus dro.

Hibsch ramponiert is's, des is wohr,
zofichtig, trotzdem kauf
i mir koa neis, stäi Johr um Johr
mei guads oids Kripperl auf.

Warum i jetz grod dees so mog?
Ja, wißts: Beim Einischaung
kriag i auf meine oidn Dog
wia damois Kinderaung...