Friedensmission

Hinweis:
Eine schriftdeutsche "Übersetzung" des folgenden Gedichts,
das auf die Terroranschläge in London hin entstanden ist,
findet der Nicht-Bayer im Forum (Eigene Werke) unter dem Titel:
Aus aktuellem Anlaß: Friedens-Mission


Friedensmission


Was heißt da bittschön: "Die sann alle narrisch"?
Was heißt da: "Die sann grausam und barbarisch"?
Für den, der nachdenkt, is des ganz verständlich.
Weil jeder Glauben möcht ja doch letztendlich
nix anders als daß d' Leit in Frieden lem,
daß s' glücklich sann und 's eahna guad geht em,
daß quasi halt a Stückerl Paradies
die Gläubigen im Lem vergunnt scho is.

Waar dees net schee? Taat sowas net uns oin,
egal ob Christen oder Moslems, gfoin?!
Nur is halt so a Glaubens-Missioniern
net einfach; da konn allerhand passiern!
Weil aus Verblendung z'erst die allermeisten
Ungläubigen an Widerstand no leisten.

Schaun'S, beispielsweis die Kreuzzüg seinerzeit:
die warn ja aa net einfach für die Leit!
Was is da teures Christenblut geflossen,
was hamms da Ström' an Heidenblut vergossen,
damit die aa den rechten Glaum onemman -
weils sonst, wenns sterm, ja net inn Himme kemman!

Scho damois war für Frieden, Glück und Heil
koa bluadigs Opfer z' schad - im Gegenteil!
Und trotzdem is des Ziel heut immer no
net ganz erreicht, werd heut no immer dro
recht fleißig g'arbeit - net so von die Christen:
heut eher mehr von andre Idealisten,
die mit am Friedenswillen ohnegleichen
an d' Arbeit gengan - sei's aa über Leichen.

Nur schad, daß d' Leit des meistens net kapiern,
daß die ja bloß fürn Frieden missioniern.
Die schrein bloß - weil sie's halt net besser wissen:
"A Terroranschlag! Tausend Leit hat's z'rissen!"
Die sehn net ei, daß no zu keinen Zeiten
es einfach war, den Frieden zu verbreiten,
nach dem doch alle Religionen strem.
Das is daran des menschliche Problem!
Weil - schaun'S - der Mensch, aa wenn er noch so denkt,
bleibt doch in seiner Einsicht meist beschränkt...

I freilich seh - ois g'lernter Philosoph -
den guten Will'n in jeder Katastroph
und sag jedsmoi, wenns wieder wo was sprengan,
wenn wieder tausend Leit zum Teifi gengan
und eahna Bluad die ganze Straß verschmiert,
wenn's munter weltweit kracht und explodiert:
"Schaug hi: da werd fürn Frieden missioniert!"

Und wenn's so weitergeht, hamm wir ganz gwieß
scho bald auf Erden hier das Paradies!