Verwäid

Entschuidigen'S, do hob i mi verwäid.
Iatz sowos! Is mir unerklärlich, wia
dees gscheng is! Weil Sie woit i ja gor nia!
Do hod mir irgendwer an Schmarrn verzäid

mid derer Nummer, mir a Mausfoin gschdäid.
Wos song'S? Iatz konn i nimmer zruck? Ja, mir
werd angst und bang! Wenn i dees rechd kabbier,
na kostn Sie mi ja no mehrer Gäid?!

Es war doch zerschd scho wirklich deier gnua.
Drum woit i ja an billigern Darief.
Und iatz verlangan Sie no wos dazua?
Ja Kruzifix, wo kemmer denn do hi!?

Wer hod mi denn do einerglegt so wief
mid derer Nummer!? - Wos? - Ach, dees warn Sie!?