Auf am Bangerl

Auf am Bangerl

(aus de Häglwerther Säsoneddl)


Soin de Turisdn se no oweschwitzn
und ummananderrenna wia ned gscheid!
I mog an so am scheena Dog wia heid
am ollerliawern auf meim Bangerl sitzn

am Sä, sieg d' Sonna durch de Bladln blitzn,
draam vor mi hi und deng grod, wos mi gfreid.
Vialeicht waar diam der Himme gor ned weid,
ja liegd der quasi vor der Nosnschbitzn!?

Is's paradiesisch ned am Sä!? Drum miaßn
aa dauernd de Turisdn Foddos schiaßn.
Ois hädns wos dahoam vom Foddoschaung!

Koa Buid zoagd, wia der Säwoid rauschd und riachd,
wia d' Fisch im Sä se schbuin im Sonnaliachd.
I sieg mein Sä - sogor mid gschlossne Aung.